Buyuk Britaniyada sud so‘nggi qarorlaridan birida soqolni zo‘rlik bilan oldirish diniy va siyosiy ta’qib shakli bo‘lishi mumkinligini tan oldi. Natijada, Tojikistonlik muhojir deportatsiyadan saqlanib qolgan va mamlakatda qolishga ruxsat berilgan. Bu haqda The Telegraph nashri xabar bermoqda.
Sud hujjatlarida keltirilishicha, ariza beruvchi erkak o‘z yurtida soqolini majburan oldirishga majbur bo‘lishi mumkinligini bildirdi. Uning fikricha, bu holat diniy e’tiqod erkinligining buzilishi sifatida baholanishi lozim. Buyuk Britaniya Oliy immigratsiya sudi mazkur pozitsiyani asosli deb topdi.
Tojikistonda soqolni zo‘rlik bilan oldirish bo‘yicha keng qamrovli amaliyot mavjudligi ma’lum qilinmoqda. Rasmiylarning bayonotiga ko‘ra, bu chora-tadbirlar diniy ekstremizmga qarshi kurashning bir qismi sifatida olib borilsa-da, mustaqil manbalar uni musulmon erkaklarning tashqi ko‘rinishiga nisbatan bosim va nazorat shakli sifatida talqin qilmoqda.
Ma’lumotlarga ko‘ra, Tojikistonda soqol qo‘ygan shaxslar muntazam ravishda huquqni muhofaza qiluvchi organlar tomonidan ushlanib, soqollarini oldirishga majbur qilinmoqda, ularning barmoq izlari maxsus bazalarga kiritilmoqda.
Oliy sudya Parminder Saini ta’kidlashicha, pastki instansiya sudida muhojirning soqolini oldirishga tayyor bo‘lgani — uning xavfsizlik nuqtayi nazaridan majburligi inobatga olinmagan. Bu esa, sudya fikricha, muhojirning boshpana olishiga asos bo‘luvchi omil sifatida ko‘rib chiqilishi kerak.
Mazkur ish Buyuk Britaniyada muhojirlar huquqlari va deportatsiya siyosati borasidagi bahs-munozaralarga sabab bo‘ldi. Yaqinda alohida holatda 10 yoshli o‘g‘lining oziq-ovqatga nisbatan qiyinchiliklari sababli deportatsiyasi vaqtincha kechiktirilgan alban muhojirining ishi ham keng jamoatchilik muhokamasiga sabab bo‘lgandi.