“Qulbeshkak” konida tabiiy gaz va kondensat olinadigan yangi quduq ochildi. Bu haqda “O‘zbekneftgaz” AJ Matbuot xizmati xabar qildi.
Qayd etilishicha, “Qulbeshkak” gazkondensat konidagi 68-sonli quduqda olib borilgan burg‘ilash ishlari muvaffaqiyatli yakunlangan. Quduqda burg‘ilash ishlari tugatilgach, 1886-1883m, 1881-1878m va 1870-1866 metr oraliqlarida perforasiya ishlari olib borilgan.
Quduqni o‘zlashtirish ishlaridan so‘ng, kunlik 70 ming kub metr sanoat miqyosidagi tabiiy gaz va 1 tonna gaz kondensati qazib chiqarilishiga erishilgan.
Kon Buxoro viloyatining Qorako‘l tumanida joylashgan bo‘lib, 2008 yildan buyon ishlatib kelinmoqda. Hozirda quduqni Uchqir gazni qayta ishlash zavodining quvuriga ulash ishlari olib borilmoqda.