Toshkent shahar Chilonzor tumanidagi mis quvurlari ishlab chiqaruvchi sexda yong‘in sodir bo‘ldi.
Favqulodda vaziyatlar vazirligining maʼlum qilishicha, bugun, 14-iyun kuni soat 09:50 da Chilonzor tumanida joylashgan mis quvurlari ishlab chiqarish sexining bir qavatli bostirmasi (angar)da dastlabki maʼlumotlarga ko‘ra havo-gaz aralashmasining chaqnashi sodir bo‘lgan.
Natijada voqea joyiga FVV rahbariyati boshchiligida yong‘in-qutqaruv ekipajlari, shuningdek, Prokuratura, IIV, MG, SSB va boshqa tegishli tashkilotlar xodimlari yetib borgan. Hozirda hodisa oqibatlari bartaraf etilmoqda.
Dastlabki maʼlumotlarga ko‘ra chaqnash oqibatida 6 nafar fuqaro turli darajada tan jarohati olib, Respublika shoshilinch tibbiy yordam ilmiy markaziga yotqizilgan.