Unda aytilishicha, “chiroyli” avtomobil raqamlarining sotilishi hayratlanarli darajaga chiqqan.
Tovar-xomashyo birjasining so‘nggi statistik maʼlumotlariga qaraganda, “chiroyli” avtomobil raqamlarini sotish bo‘yicha rekordlar yangilanishda davom etmoqda.
2021-yilning to‘qqiz oyida 105,6 mingta avtomobil raqami sotib olingan va ularga 221,1 milliard so‘m mablag‘ sarflangan. Bu savdo boshlanganidan buyon mutlaq rekord natijadir. 2018-2020 yillarda bu raqam 205,1 milliard so‘mni tashkil etgan.
Joriy yilning birinchi yarmida avtomobil raqamlarini sotish 139 milliard so‘m, iyul -sentabr oylarida esa mazkur summaga yana 82 milliard so‘mga yaqin mablag‘ qo‘shilgan. Bu hatto, butun 2019-yil davomida sotilgan avtomobil raqamlaridan ham ko‘p degani.
Maʼlumot uchun: 2020-yil noyabr oyidan har qanday kombinatsiyali “chiroyli” avtoraqamlar uchun buyurtma berishga ruxsat berildi. Maxsus raqamlarning boshlang‘ich narxi oddiy raqamdan ancha yuqori.
Bundan avval 1-iyuldan davlat tashkilotlari avtomobillari raqamlari o‘zgarishi, istalgan fuqaro UZB, AAA seriali avtoraqamlarni auksion orqali sotib olishi mumkinligi hamda onlayn-auksionlar orqali 168 milliard so‘mlik “chiroyli” avtoraqamlar sotilgani haqida xabar berilgandi.
Olamgir Abdiyev