Ijtimoiy tarmoqlarda COVID-19'ga qarshi emlangan fuqarolarga davlat tomonidan ajratilgan 750 ming so‘mni Sog‘liqni saqlash vazirligining veb-sayti orqali olish uchun havola keltirilgan maʼlumotlar tarqatilmoqda.
Mazkur maʼlumotlar yolg‘on va haqiqatga mos kelmaydi.
Maʼlumki, koronavirus pandemiyasi davrida ayrim ijtimoiy tarmoq sahifalari orqali turli asossiz, hech qanday haqiqatga to‘g‘ri kelmaydigan va rasmiy manbalar orqali tasdiqlanmagan uydirma maʼlumotlarni tarqatish hollari tez-tez kuzatilmoqda.
Bu esa keng jamoatchilik orasida turli tushunmovchiliklarning yuzaga kelishiga, baʼzi hollarda esa ortiqcha sarosimalarga sabab bo‘lmoqda. Jumladan, vaksina olgan fuqarolar uchun 750 ming so‘m miqdorida pul mablag‘i berilayotgani haqidagi axborot ham ana shunday maqsadda tarqatilgan bo‘lib, hech qanday rasmiy asosga ega emas.
Shuning uchun, vazirlik aholidan bu kabi feyk xabarlarga ishonmaslik, vaksinatsiya jarayonlari bilan bog‘liq eng to‘g‘ri maʼlumotlarni Sog‘liqni saqlash vazirligining rasmiy ssv.uz sayti hamda Telegram'dagi sahifalari orqali olish mumkinligini eslatib o‘tadi.
Maʼlumot uchun: bu kabi yolg‘on xabarlarni tarqatish tegishli tartibda javobgarlikka sabab bo‘ladi.
