Ижтимоий тармоқларда COVID-19'га қарши эмланган фуқароларга давлат томонидан ажратилган 750 минг сўмни Соғлиқни сақлаш вазирлигининг веб-сайти орқали олиш учун ҳавола келтирилган маълумотлар тарқатилмоқда.
Мазкур маълумотлар ёлғон ва ҳақиқатга мос келмайди.
Маълумки, коронавирус пандемияси даврида айрим ижтимоий тармоқ саҳифалари орқали турли асоссиз, ҳеч қандай ҳақиқатга тўғри келмайдиган ва расмий манбалар орқали тасдиқланмаган уйдирма маълумотларни тарқатиш ҳоллари тез-тез кузатилмоқда.
Бу эса кенг жамоатчилик орасида турли тушунмовчиликларнинг юзага келишига, баъзи ҳолларда эса ортиқча саросималарга сабаб бўлмоқда. Жумладан, вакцина олган фуқаролар учун 750 минг сўм миқдорида пул маблағи берилаётгани ҳақидаги ахборот ҳам ана шундай мақсадда тарқатилган бўлиб, ҳеч қандай расмий асосга эга эмас.
Шунинг учун, вазирлик аҳолидан бу каби фейк хабарларга ишонмасликларини, вакцинация жараёнлари билан боғлиқ энг тўғри маълумотларни Соғлиқни сақлаш вазирлигининг расмий ssv.uz сайти ҳамда Telegram'даги саҳифалари орқали олишлари мумкинлигини эслатиб ўтади.
Маълумот учун: бу каби ёлғон хабарларни тарқатиш тегишли тартибда жавобгарликка сабаб бўлади.