AQSHning Merilend universiteti tibbiyot markazida birinchi marta genetik modifikatsiyalangan cho‘chqaning yuragini odamga ko‘chirib o‘tkazish bo‘yicha muvaffaqiyatli operatsiya o‘tkazildi. Bu haqda Associated Press agentligi xabar berdi.
Qayd etilishicha, bemor 57 yoshli Devid Bennet ismli erkak bo‘lib, unga davolab bo‘lmaydigan yurak xastaligi tashxisi qo‘yilgan. U bir nechta tibbiyot markazlaridan transplantatsiya operatsiyasini o‘tkazish bo‘yicha rad javobini olgan. Eksperimental protsedura uning so‘nggi imkoniyati edi.
“Birinchi turdagi jarrohlik amaliyoti natijasida davolab bo‘lmaydigan yurak xastaligiga chalingan 57 yoshli bemorga genetik modifikatsiyalangan cho‘chqa yuragi muvaffaqiyatli transplantatsiya qilindi, uch kundan buyon uning ahvoli yaxshi”, — deyiladi xabarda. Shuningdek, bemorning bir necha hafta shifokorlar nazoratida bo‘lishi ta’kidlangan.
Shifokorlar kelajakda bunday operatsiyalar donor organlarning yetishmasligi muammosini hal qilishini taʼkidlamoqda. Nashr maʼlumotlariga ko‘ra, bugungi kunda Qo‘shma Shtatlarda 110 mingga yaqin odam aʼzolarni ko‘chirib o‘tkazish uchun navbatda turibdi, ulardan olti mingga yaqin bemor har yili operatsiyani kutmasdan vafot etadi.
Eslatib o‘tamiz, avvalroq 56 yoshli AQSH fuqarosi yuragidan o‘n santimetrlik sement olib tashlangani haqida xabar berilgandi.