Bugun, 12 dekabrdan boshlab “Humo Air” MCHJ aviakompaniyasi Farg‘ona – So‘x – Farg‘ona yo‘nalishida muntazam parvozlarni amalga oshirishni boshladi. Bu haqda O‘zbekiston Respublikasi Transport vazirligi matbuot xizmati xabar berdi.
Maʼlum qilinishicha, dastlabki bosqichda haftasiga ikki marotaba yo‘lovchi tashuvlari yo‘lga qo‘yiladi. Parvozlar haftaning dushanba va juma kunlari Farg‘ona – So‘x yo‘nalishida soat 10:00 da va So‘x – Farg‘ona yo‘nalishida soat 12:00 da bajarilishi rejalashtirilgan. Aviaqatnovlar AN-2 samolyotlarida amalga oshiriladi. Parvoz davomiyligi 30 daqiqani tashkil etadi.
Yo‘lovchilar aviachiptalarni Farg‘ona, Andijon va Namangan aeroportlari hamda So‘x tumani hokimiyati binolarida xarid qilishlari mumkin.
Avvalroq Samarqandda shaharlararo aviaqatnovlar tiklangani va "Uzbekistan Airways" xorijiy aviakompaniyalar uchun tariflarni pasaytirgani haqida xabar qilingan edi.
Javohirbek Tursunov
