Farg‘ona viloyatining Uchko‘prik tumanida odam o‘limi bilan bog‘liq yo‘l-transport hodisasi yuz berdi.
Tergovga oid ish hujjatlarida qayd etilishicha, 1989 yil Qanig‘li qishlog‘ida tug‘ilgan haydovchi o‘ziga tegishli bo‘lgan Nexia rusumli avtomashinani boshqarib kelayotgan vaqtida yo‘lning o‘ng tomonidan chap tomoniga kesib o‘tayotgan piyodani urib yuborgan.
Avtohalokat oqibatida og‘ir tan jarohati olgan jabrlanuvchini haydovchining o‘zi zudlik bilan shifoxonaga olib borgan. Biroq ko‘rsatilgan tibbiy muolajalarga qaramay, u shifoxonada vafot etgan.
Mazkur holat yuzasidan Jinoyat kodeksining 266-moddasi ikkinchi qismi bilan jinoyat ishi qo‘zg‘atilib, hozirda Uchko‘prik tumani Ichki ishlar bo‘limi huzuridagi tergov bo‘linmasi tomonidan jinoyat ishi bo‘yicha dastlabki tergov harakatlari olib borilmoqda.