Fransiya juda kuchli elektromagnit nurlanish tufayli iPhone 12 sotuvini to‘xtatganini maʼlum qildi.
Tegishli qaror Fransiya milliy chastotalar agentligi (Agence nationale des frequences) tomonidan qabul qilindi. Regulyator Apple‘ni dasturiy taʼminotni yangilash orqali ushbu muammoni hal qilmasa, Fransiyada sotilgan barcha iPhone 12‘lar qaytarib olinishi haqida ogohlantirdi.
"Apple‘da javob qaytarish uchun ikki hafta muddat bor", — dedi Fransiya raqamli texnologiyalar vaziri Jan-Noel Barro. Bundan tashqari, vazir Fransiya o‘z xulosalarini Yevropa Ittifoqining boshqa mamlakatlaridagi tartibga soluvchi organlar bilan ham bo‘lishishga vaʼda berdi.
Apple vakili BBC‘ga kompaniya ANFR xulosalariga rozi emasligini va kompaniyaning mahsulotlari barcha qoidalarga mos kelishini aytdi.