Fransiyada Yangi yil arafasida yoqib yuborilgan avtomobillar soni keskin oshdi. Mamlakat Ichki ishlar vazirligi rasmiy ma’lumotlariga ko‘ra, bayram kunlari davomida jami 1173 ta avtomobil butunlay yo‘q qilingan.
Qayd etilishicha, bu ko‘rsatkich o‘tgan yilga nisbatan qariyb 200 taga ko‘p. Avtomobillarni ataylab yoqib yuborish holatlari, asosan, Yangi yil kechasida va bayramning ilk kunlarida qayd etilgan.
Shuningdek, Ichki ishlar vazirligi mamlakat bo‘ylab zo‘ravonlik va mulkka zarar yetkazish bilan bog‘liq hodisalar sabab 505 nafar shaxs qo‘lga olinganini bildirdi. Ularning 403 nafari bevosita politsiya tomonidan hibsga olingan. Rasmiylar jamoat tartibini saqlash bo‘yicha choralar kuchaytirilganini ma’lum qildi.