Тадбиркорлар ва ишбилармонлар ҳаракати – Ўзбекистон Либерал-демократик партиясидан Ўзбекистон Республикаси Президентлигига номзод Шавкат Мирзиёевнинг қорақалпоғистонлик сайловчилар билан учрашуви бўлиб ўтмоқда.
Учрашувда номзод сайловчиларни ўзининг сайловолди дастури билан таништириб, ўтган йиллар давомида қилинган ишлар ҳақида тўхталиб ўтган.
Маълум қилинишича, Қорақалпоғистонда 51 минг оиланинг уй-жой шароити яхшиланган. Аҳолини ичимлик суви билан таъминлаш даражасини 71 фоизга етган.
Орол денгизининг қуриган ҳудуди ўрнида 1 миллион 800 минг гектар яшил ўрмонзор барпо этилган. Боғчалар қамрови 28 фоиздан 81 фоизга, уларнинг сони эса 317 тадан 1 минг 600 тага кўпайган.
172 та мактаб мукаммал таъмирлангани, 104 та мактабда қўшимча бинолар барпо этилгани ҳисобига, 118 мингта янги ўқувчи ўрни яратилган. Қорақалпоғистондаги олийгоҳлар сони 2 баробар кўпайиб, 12 тага етган.
Олийгоҳларга қабуллар сони эса 3,5 марта ошиб, қамров 19 фоиздан 46 фоизга ўсган. Ҳозирги вақтда бу ерда 58 минг талаба таҳсил олмоқда.
“Албатта, қилинган ишлар ҳақида кўп гапириш мумкин, лекин ислоҳотларимиз натижасига баҳо берадиган энг холис ҳакам, бу – халқимиз”, – деди Шавкат Мирзиёев.
