Bosh prokuratura huzuridagi departamentning xabar berishicha, Jizzax viloyati Yangiobod tumanida mijozlarning kredit qarzdorligi uchun to‘langan pullarni o‘zlashtirgan sobiq yetakchi mutaxassis aniqlandi.
Qayd etilishicha, ATB “Qishloq qurilish bank” Yangiobod filialining kreditlash bo‘limi sobiq yetakchi mutaxassisi N.Q. fuqaro M.B.ning nomiga 20 million so‘m kredit olib o‘zlashtirgani, shuningdek, bank mijozlari SH.N. va M.O.dan kredit qarzdorligini so‘ndirish uchun qabul qilgan jami 61,4 million so‘m naqd pullarini bank kassasiga topshirmasdan talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (O‘zlashtirish yoki rastrata yo‘li bilan talon-toroj qilish) va 228-moddasi (Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.