Kolumbiya prezidenti Gustavo Petro AQSh tomonidan sanksiyalar ro‘yxatiga kiritilgani bo‘yicha sudga murojaat qilishga tayyor ekanini ma’lum qildi. Unga ko‘ra, AQSh tomoni sanksiyalar sababini izohlab bera olmagan, shuningdek, Donald Trampning uni “giyohvand moddalar sotuvchisi” deb atagani haqidagi bayonot ham asossiz bo‘lgan.
Petro muzokaralar o‘tkazish uchun vaqt berishini aytdi, biroq hech qanday natija bo‘lmasa, qonuniy kurash boshlashga majbur bo‘lishini ta’kidladi. “Agar hech narsa o‘zgarmasa, AQShga qarshi qonuniy choralar ko‘raman. Vaqtim bo‘ladi, chunki tez orada prezidentlik muddati tugaydi”, — dedi u.
Eslatib o‘tamiz, 24-oktabr kuni AQSh Moliya vazirligi Petro, uning rafiqasi va o‘g‘liga nisbatan sanksiyalar joriy etgan edi. Bungacha AQSh prezidenti Donald Tramp kolumbiyalik hamkasbini “bandit, narkotik sotuvchi va yomon odam” deb tanqid qilgan edi.