Bugun Birlashgan Arab Amirliklari poytaxtida Shayx Zoid nomidagi “Insoniy birodarlik” xalqaro mukofoti taqdirlash marosimi doirasida yuqori darajadagi global forum ochildi. Tadbirda xorijiy mamlakatlarning Birinchi xonimlari, Nobel mukofoti sohiblari, BMT agentliklari va yetakchi xalqaro tashkilotlar rahbarlari, BAA va Ko‘rfaz davlatlarining yuksak martabali siyosatchilari, vazirlar, shuningdek, texnologiya va sun’iy intellekt etikasi sohasidagi yetakchi olimlardan iborat 150 nafar nufuzli mehmon ishtirok etdi.
O‘zbekiston Respublikasi Prezidenti Administratsiyasi rahbari Saida Mirziyoyeva forumning “Ayollar yetakchiligi insoniy birodarlik markazida” mavzusidagi 1-sessiyasida nutq so‘zladi.
Nutqida Saida Mirziyoyeva ayollar yetakchiligi va ta’lim huquqini inson qadrining asosiy mezoni sifatida himoya qilish g‘oyasini ilgari surdi. U O‘zbekistonning ayollarni ijtimoiy himoya qilish va yetakchilikdagi muvaffaqiyatli islohotlarini misol qilib keltirdi hamda bu amaliyot milliy rivojlanish va butun mintaqada tinchlik hamda hamjihatlikni mustahkamlashga xizmat qilishini ta’kidladi.
“O‘zaro hurmat bilan yo‘g‘rilmagan rivojlanish uzoqqa cho‘zilmaydi. Kuchli jamiyatlar nafaqat qonunlarga, balki insonlar orasidagi o‘zaro ishonchga ham asoslanadi, ishonch esa ko‘pincha ayollar o‘rtasidagi munosabatlar va yetakchilik orqali mustahkamlanadi”, — dedi Saida Mirziyoyeva.