Fransiya prezidenti Emmanuel Makron Yevropa zarur choralar ko‘rmasa, yaqin besh yil ichida jiddiy inqirozga yuz tutishi va hatto yo‘qolib ketish xavfi ostida qolishi mumkinligini bildirdi. U bu haqda 10-fevral kuni Tagesanzeiger gazetasiga bergan intervyusida ma’lum qildi.
Makronning ta’kidlashicha, Yevropa hozir ikki tomonlama bosim ostida qolgan. Bir tomondan, Xitoy bilan savdo munosabatlarida bosim kuchaymoqda, ikkinchi tomondan esa AQSh siyosatidagi noaniqlik va beqarorlik vaziyatni yanada murakkablashtirmoqda.
"Yevropa ushbu jarayonlarda yoki tomoshabin bo‘lib qoladi, yoki faol ishtirok etishi lozim", — dedi Fransiya prezidenti.
Shuningdek, Makron Grenlandiya bilan bog‘liq vaziyatni Yevropa uchun muhim geosiyosiy burilish nuqtasi deb atadi. Uning fikricha, bu holat qit’aga nisbatan mavjud tahdidlarni ochiq-oydin namoyon qilmoqda.
Prezident, shuningdek, Yevropa jamiyatida umidsizlik kayfiyati kuchayib borayotganini ham qayd etdi.