Fransiya prezidenti Emmanuel Makronning rafiqasi Brijit Makron Buyuk Britaniyaga yetib kelganida turmush o‘rtog‘ining yordam qo‘lini rad etib, uni yana omma oldida noqulay holatga tushirdi. Bu holat France 24 telekanali tomonidan namoyish etilgan videoda yaqqol ko‘rinadi.
Videoda ko‘rinishicha, prezident Makron samolyotdan birinchi bo‘lib tushgan va orqasidan oppoq libosda chiqqan Brijit Makronni kutib, unga qo‘l cho‘zgan. Biroq Brijit bu taklifni rad etib, tutqichga suyanib zinapoyadan mustaqil ravishda pastga tushgan.
Makron rad etilganidan so‘ng qo‘lini tushirib, ularni kutib olgan shahzoda Uilyam va malika Keyt Midlton tomon yuzlangan. Hodisa Britaniyaning Nortolt harbiy bazasida yuz bergan.
Avval ham Makron juftligining jamoat joylaridagi harakatlari OAV e’tiborini tortgan edi. Jumladan, may oyida Vetnamga tashrifi chog‘ida prezidentning ehtiyotsiz harakati oqibatida rafiqasi yuziga tasodifan urilgan holat ham jurnalistlar tomonidan qayd etilgan edi.