Maxsus komissiya ishchi guruhlari tomonidan 24–29-noyabr kunlari atmosferani ifloslantirayotgan manbalarni aniqlash va bartaraf etish bo‘yicha keng ko‘lamli reydlar o‘tkazildi. Komissiya vakili Ikrom Tagayevning ma’lum qilishicha, O‘zbekistanda so‘nggi kunlarda sovuq antisiklon ta’siri kuchayib, 5 dekabrgacha davom etishi kutilmoqda. Ushbu jarayon atmosfera bosimining oshishi, haroratning pasayishi, ertalabki tumanlar va inversiya tufayli havodagi chang va tutun zarralarining past qatlamlarda to‘planishiga olib kelmoqda.
Reydlar davomida issiqxonalar, qurilish obyektlari va avtotransport vositalari bo‘yicha ko‘plab qonunbuzarliklar aniqlandi. Jami 1 788 ta issiqxona tekshirilib, 73 tasining faoliyati to‘xtatildi, 621 nafar shaxsga ma’muriy bayonnoma rasmiylashtirildi. Qurilish sohasida esa 530 dan ortiq noqonuniy obyekt qayd etilib, 40 tasi vaqtincha to‘xtatildi. Atmosferani ifloslantirish bo‘yicha 215 kishi javobgarlikka tortildi. Ko‘plab qurilish maydonlariga suv purkagichlar o‘rnatildi.
Avtotransport yo‘nalishida ham qat’iy choralar ko‘rildi: yukni ochiq tashigan 1 959 nafar haydovchi va me’yoridan ortiq zararli tashlama qilgan 239 nafar haydovchi jarimaga tortildi. Yo‘l qoidalarini buzish va yo‘l qoplamasini ifloslantirish bilan bog‘liq jami 10 mingdan ortiq holatda ma’muriy choralar ko‘rildi. Shuningdek, shahar bo‘ylab 183 ta ko‘cha, 165 ta jamoat joyi namlantirildi, ariqlar tozalandi, 126 ta favvora ishga tushirildi.
Mutasaddilarga ko‘ra, amalga oshirilgan choralar qisqa muddatda havoning ifloslanish darajasini pasaytirgan bo‘lsa-da, sovuq antisiklon tufayli inversiya jarayoni hanuz kuchayib turibdi. Shu sabab, havoning tabiiy tozalangan sur’ati sekinlashgan. Maxsus komissiya atmosferaga zarar yetkazayotgan manbalarni aniqlash va bartaraf etish bo‘yicha tunu-kun kuchaytirilgan nazoratni davom ettirmoqda.