Anqara shahridagi Prezident saroyida O‘zbekiston Respublikasi Prezidenti Shavkat Mirziyoyev va Turkiya Respublikasi Prezidenti Rejep Tayyip Erdog‘an o‘rtasida tor doiradagi uchrashuv bo‘lib o‘tdi. Muzokaralar ikki mamlakat o‘rtasidagi hamkorlikni yanada mustahkamlashga qaratildi.
Suhbat avvalida davlat rahbarlari yaqinlashib kelayotgan muqaddas Ramazon oyi munosabati bilan bir-birlarini samimiy tabrikladilar. Tomonlar O‘zbekiston va Turkiya o‘rtasidagi keng qamrovli strategik sheriklik munosabatlarining bugungi holatini ijobiy baholab, uni siyosiy, savdo-iqtisodiy, madaniy va gumanitar sohalarda kengaytirish masalalarini atroflicha ko‘rib chiqdilar.
So‘nggi yillarda barcha darajalarda faol va izchil muloqot yo‘lga qo‘yilgani mamnuniyat bilan qayd etildi. Xususan, strategik rejalashtirish guruhining “4+4” formatidagi uchrashuvi samarali natijalar bergani ta’kidlandi. O‘zaro tovar ayirboshlash hajmi, qo‘shma korxonalar soni hamda mamlakatlar o‘rtasidagi aviaqatnovlar izchil oshib bormoqda.
Uchrashuvda sanoat, qishloq xo‘jaligi, ijtimoiy himoya va boshqa ustuvor yo‘nalishlarda qo‘shma loyiha va dasturlarni ilgari surish zarurligiga alohida e’tibor qaratildi. Shuningdek, mudofaa va xavfsizlik, jumladan, kiberjinoyatchilikka qarshi kurashish sohasida hamkorlikni kuchaytirish masalalari muhokama qilindi.
Yakunda Prezidentlar xalqaro va mintaqaviy kun tartibidagi dolzarb masalalar yuzasidan ham fikr almashib, o‘zaro hamkorlikni yanada chuqurlashtirishga tayyor ekanliklarini bildirdilar.