Ijtimoiy tarmoqlarda Namangan viloyatining Yangiqo‘rg‘on tumanidagi ko‘priklardan biri qulab tushish holatiga kelib qolgani aytilgan video tarqaldi. Holat yuzasidan viloyat Favqulodda vaziyatlar boshqarmasi maʼlumot berdi.
Maʼlum qilinishicha, Yangiqo‘rg‘on tumani “Olmazor” MFY hududidan oqib o‘tuvchi “Podsho ota” soyi ustiga qurilgan ko‘prikda qisman nosozlik borligi aniqlangan.
Shundan so‘ng ko‘prikda transport vositalarining harakati vaqtincha to‘xtatilgan. Avtomobillar uchun soyning ichki o‘zanidan boshqa yo‘l ochib berilgan va qatnov davom ettirilmoqda.
Hozirda ko‘prikdagi nosozlikni bartaraf etish ishlari olib borilmoqda.