Наманганда автомобиллар қатновчи кўприк қулаб тушиши мумкинлиги айтилди
Ҳолат бўйича вилоят ФВВ маълумот берди.
Ижтимоий тармоқларда Наманган вилоятининг Янгиқўрғон туманидаги кўприклардан бири қулаб тушиш ҳолатига келиб қолгани айтилган видео тарқалди. Ҳолат юзасидан вилоят Фавқулодда вазиятлар бошқармаси маълумот берди.
Маълум қилинишича, Янгиқўрғон тумани “Олмазор” МФЙ ҳудудидан оқиб ўтувчи “Подшо ота” сойи устига қурилган кўприкда қисман носозлик борлиги аниқланган.
Шундан сўнг кўприкда транспорт воситаларининг ҳаракати вақтинча тўхтатилган. Автомобиллар учун сойнинг ички ўзанидан бошқа йўл очиб берилган ва қатнов давом эттирилмоқда.
Ҳозирда кўприкдаги носозликни бартараф этиш ишлари олиб борилмоқда.
