Davlat test markazi ijtimoiy tarmoqlarda tarqalayotgan test materiallari yuzasidan rasmiy munosabat bildirdi.
Qayd etilishicha, biologiya fanidan savollar aks etgan 6153320 raqamli test topshiriqlari kitobi 9-avgust kuni Namangan viloyatida o‘tkazilgan test sinovlariga taalluqli. Mazkur abituriyent test topshiriqlari kitobining 1 varag‘ini yirtib olib chiqib ketgani videokuzatuv orqali aniqlanib, Vazirlar Mahkamasining 2018-yil 3-apreldagi 261-son qarori bilan tasdiqlangan Nizomning 52-bandiga muvofiq test sinovidan chetlashtirilgan.
Eslatib o‘tamiz, avvalroq DTM kimyo fani bo‘yicha tarqalgan test savollari yuzasidan rasmiy izoh bergandi. Ma’lum bo‘lishicha, test topshiriqlari kitobi 8-avgust kuni Farg‘ona viloyatida o‘tkazilgan test sinovlariga taalluqli. Abituriyent test sinovi vaqtida telefondan foydalanayotgani aniqlangan va dalolatnoma asosida test sinovlaridan chetlashtirilgan.