Давлат тест маркази ижтимоий тармоқларда тарқалаётган тест материаллари юзасидан расмий муносабат билдирди.
Қайд этилишича, биология фанидан саволлар акс этган 6153320 рақамли тест топшириқлари китоби 9-август куни Наманган вилоятида ўтказилган тест синовларига тааллуқли. Мазкур абитуриент тест топшириқлари китобининг 1 варағини йиртиб олиб чиқиб кетгани видеокузатув орқали аниқланиб, Вазирлар Маҳкамасининг 2018-йил 3-апрелдаги 261-сон қарори билан тасдиқланган Низомнинг 52-бандига мувофиқ тест синовидан четлаштирилган.
Эслатиб ўтамиз, аввалроқ ДТМ кимё фани бўйича тарқалган тест саволлари юзасидан расмий изоҳ берганди. Маълум бўлишича, тест топшириқлари китоби 8-август куни Фарғона вилоятида ўтказилган тест синовларига тааллуқли. Абитуриент тест синови вақтида телефондан фойдаланаётгани аниқланган ва далолатнома асосида тест синовларидан четлаштирилган.