Malakali kadrlar tayyorlash, ularning raqobatbardoshligini oshirish O‘zbekiston Respublikasi oldida turgan strategik vazifalardan biri. Buning uchun eng avvalo taʼlim va mehnat bozorining hamkorligini yo‘lga qo‘yish muhim. O‘zbekiston Respublikasi Vazirlar Mahkamasi, uning huzuridagi Taʼlim sifatini nazorat qilish davlat inspeksiyasi, Bandlik va Mehnat munosabatlari, Oliy Taʼlim vazirliklari, YUNESKOning O‘zbekistondagi vakolatxonasi hamkorligida tashkil etilgan xalqaro seminarda aynan shu haqda so‘z bordi.
Prezident Shavkat Mirziyoyev 31 avgust kuni qayd etganidek, Respublikada oliy taʼlim qamrovi so‘nggi besh yilda 29 foizga oshirildi. Hozirda yuz minglab bo‘lajak kadrlar OTMlarda tahsil olmoqda. Bandlik va Mehnat munosabatlari vaziri Nozim Husanov har yili mehnat bozoriga 700 ming yangi ishchi kuchi kirib kelayotganini maʼlum qildi.
Endilikda ularning soni emas, sifatini oshirish dolzarb ahamiyat kasb etyapti. Vazir o‘rinbosari Bahodir Umrzoqovning aytishicha, O‘zbekistonda 1.4 million bo‘sh ish o‘rni mavjud, ammo 1.5 millionga yaqin ishsiz fuqarolar ham bor. Bunday nomutanosiblikning bosh sabab i–– zarur kasbiy malaka mavjud emasligida.
So‘nggi yillarda malakali kadrlar yetishtirish, mehnat bozori bilan taʼlimni integratsiya qilish maqsadida qator ishlar amalga oshirildi. Oliy va O‘rta-maxsus taʼlim vaziri birinchi o‘rinbosari Komiljon Karimov buni hayotning o‘zi taqozo qilayotganini alohida taʼkidladi. 2021-2022 o‘quv yilidan boshlab OTM o‘quv reja va dasturlari mehnat bozori talablaridan kelib chiqqan holda ishlab chiqilishiga eʼtibor qaratilmoqda.
Shuningdek, kelgusida xususiy sektorni taʼlim sohasiga jalb qilish ustuvor vazifa ekani qayd etildi. Xususiy taʼlim muassasalarini ko‘paytirish orqali raqobatbardoshlikni oshirish mumkin. Hozirda bu yo‘nalishda ham ishlar qamrovi kengaygan. Natija ham shunga yarasha. Ayni damda Respublika bo‘ylab 20 dan ortiq xususiy OTM mavjud.
Eslatib o‘tamiz, avvalroq Toshkent davlat iqtisodiyot va Indoneziya taʼlim universiteti o‘rtasida qo‘shma taʼlim dasturini tashkil etish bo‘yicha shartnoma imzolangani xabar qilingan edi.