Ijtimoiy tarmoqda Nukusdagi ommaviy tartibsizliklarni sodir etganlikda ayblangan shaxslardan biri — Po‘lat Shamshetov kecha tongda tergov hibsxonasida yurak xurujidan vafot etgani bo‘yicha xabarlar tarqaldi. Holat yuzasidan Qoraqalpog‘iston Respublikasida yuz bergan holatlar va voqealarni o‘rganish bo‘yicha Komissiya rasmiy munosabat bildirdi.
Qayd etilishicha, mustaqil komissiya aʼzolari ertaga, 6 fevral kuni Buxoro viloyatiga tashrif buyurib, o‘lim holati sabablarini, jumladan, hibsxonadagi sharoitlar, kamera yozuvlari, dastlabki tibbiy xulosa va boshqa tegishli hujjatlarni o‘rganadi. Shuningdek, marhum bilan bitta kamerada bo‘lgan shaxslar va tergov hibsxonasi xodimlari bilan suhbat o‘tkaziladi.
“O‘rganish natijalari haqida jamoatchilik xabardor qilinishi maʼlum qilinadi”, —deyiladi xabarda.
Eslatib o‘tamiz, Qoraqalpog‘iston Respublikasi Ichki ishlar vazirligining sobiq bo‘lim boshlig‘i, marhum Po‘lat Shamshetov odamlarni ommaviy tartibsizliklarga chaqirgani va o‘zi ham namoyishlarda faol ishtirok etgani uchun 6 yilga ozodlikdan mahrum qilingandi.