Majlisda dastlab “O‘zbekiston Respublikasi Oliy Majlisi Qonunchilik palatasining 2022 yildagi faoliyati to‘g‘risida”gi masala ko‘rib chiqilyapti.
O‘tgan davrda 88 ta qonun, shuningdek, O‘zbekiston Respublikasining maʼmuriy-hududiy tuzilishi masalasiga oid Qonunchilik palatasining 3 ta qarori qabul qilinib, maʼqullash uchun O‘zbekiston Respublikasi Oliy Majlisining Senatiga yuborildi.
O‘zbekiston Respublikasi Vazirlar Mahkamasining Davlat dasturi va Davlat budjetining ijrosi yuzasidan hisobotlari har chorakda atroflicha ko‘rib chiqildi. Bu Hukumatning xalq vakillari oldidagi masʼuliyatini yana-da oshirish, davlat dasturida belgilangan vazifalarning o‘z vaqtida va sifatli bajarilishi ustidan nazoratni kuchaytirish bilan birga deputatlarning islohotlar jarayonidagi faol ishtirokini taʼminlashga xizmat qilmoqda.
Shuningdek, hisobot yilida ilk bor O‘zbekiston Respublikasi Korrupsiyaga qarshi kurashish agentligining O‘zbekiston Respublikasida korrupsiyaga qarshi kurashish to‘g‘risidagi milliy maʼruzasi Qonunchilik palatasining majlisida ko‘rib chiqildi.
Hisobot davrida Qonunchilik palatasi majlislarida hukumat a’zolari, davlat va xo‘jalik boshqaruvi organlari rahbarlarining o‘z faoliyatiga doir masalalar yuzasidan 20 marotaba axboroti eshitildi, 8 marotaba “hukumat soati” o‘tkazildi hamda 15 ta parlament so‘rovi va 310 ta deputat so‘rovi yuborildi.