Ayni paytda O‘zbekiston madaniy merosini asrash, o‘rganish va ommalashtirish bo‘yicha Butunjahon jamiyati aʼzolari ham Ozarbayjondagi kutubxonalar, muzeylar va ilmiy muassasalarida turli uchrashuvlar o‘tkazishmoqda.
Butunjahon jamiyati raisi, O‘zbekiston Respublikasi Kinematografiya agentligi bosh direktori Firdavs Abduxoliqov rahbarligidagi hayʼat aʼzolari Ozarbayjon Milliy fanlar akademiyasi Qo‘lyozmalar institutida bo‘lishdi.
Mazkur institutda arab, fors va turkiy tillarda minglab qo‘lyozmalar saqlanmoqda. Institutda bevosita O‘zbekiston madaniy merosiga daxldor qo‘lyozmalar ko‘rgazmasi tashkil qilindi. Ular orasida Alisher Navoiyning qator devonlar va boshqa asarlari, "Boburnoma"ning XVII asrdagi qo‘lyozmasi, Ibn Sino asarlarining nodir nusxalari, Abdulloh Hotifiyning “Temurnoma”si o‘rin olgan. O‘zbekistonlik mexmonlar ushbu qo‘lyozmalarni institut xodimlari bilan birgalikda tadqiq etish bo‘yicha kelishib oldilar.
"Butunjahon jamiyati tomonidan dunyoning turli mamlakatlaridagi kutubxonalarda saqlanayotgan nodir qo‘lyozmalar haqida ham o‘nlab kitob- albomlar tayyorladik. Kelgusida ozarbayjonlik olimlar bilan ham ana shunday albom tayyorlash niyatidamiz", — dedi Firdavs Abduxoliqov.
Butunjahon jamiyati raisi Firdavs Abduxoliqov Qo‘lyozmalar instituti rahbariga "O‘zbekiston madaniy merosi dunyo to‘plamlarida" turkumidan chop etilgan kitob-albomlarni topshirdi.
Butunjahon jamiyati aʼzolari Ozarbayjon davlat sanʼat muzeyi, Haydar Aliyev markazida saqlanayotgan noyob eksponatlar bilan ham yaqindan tanishdi.
