Озарбайжонда Ўзбекистон маданий меросининг нодир намуналари ўрганилмоқда

 

Айни пайтда Ўзбекистон маданий меросини асраш, ўрганиш ва оммалаштириш бўйича Бутунжаҳон жамияти аъзолари ҳам Озарбайжондаги кутубхоналар, музейлар ва илмий муассасаларида турли учрашувлар ўтказишмоқда.

 

Бутунжаҳон жамияти раиси, Ўзбекистон Республикаси Кинематография агентлиги бош директори Фирдавс Абдухолиқов раҳбарлигидаги ҳайъат аъзолари Озарбайжон Миллий фанлар академияси Қўлёзмалар институтида бўлишди.

 

Мазкур институтда араб, форс ва туркий тилларда минглаб қўлёзмалар сақланмоқда. Институтда бевосита Ўзбекистон маданий меросига дахлдор қўлёзмалар кўргазмаси ташкил қилинди. Улар орасида Алишер Навоийнинг қатор девонлар ва бошқа асарлари, "Бобурнома"нинг XVII асрдаги қўлёзмаси, Ибн Сино асарларининг нодир нусхалари, Абдуллоҳ Ҳотифийнинг "Темурнома"си ўрин олган. Ўзбекистонлик мехмонлар ушбу қўлёзмаларни институт ходимлари билан биргаликда тадқиқ этиш бўйича келишиб олдилар.

 

"Бутунжаҳон жамияти томонидан дунёнинг турли мамлакатларидаги кутубхоналарда сақланаётган нодир қўлёзмалар ҳақида ҳам ўнлаб китоб- альбомлар тайёрладик. Келгусида озарбайжонлик олимлар билан ҳам ана шундай альбом тайёрлаш ниятидамиз", — деди Фирдавс Абдухолиқов.

 

Бутунжаҳон жамияти раиси Фирдавс Абдухолиқов Қўлёзмалар институти раҳбарига "Ўзбекистон маданий мероси дунё тўпламларида" туркумидан чоп этилган китоб-альбомларни топширди.

 

Бутунжаҳон жамияти аъзолари Озарбайжон давлат санъат музейи, Ҳайдар Алиев марказида сақланаётган ноёб экспонатлар билан ҳам яқиндан танишди.