"Fergani Space" kompaniyasining birinchi sun’iy yo‘ldoshi kosmosga uchirildi. Ushbu qurilmaga buyuk astronom, matematik va geograf olim — Ahmad Farg‘oniy sharafiga "Fergani" nomi berildi.
"Fergani Space" kompaniyasining "FGN-100-d1" deb nomlangan birinchi sun’iy yo‘ldoshi "SpaceX" kompaniyasiga tegishli "Falcon 9" raketa-tashuvchisi orqali AQShning Vandenberg bazasidan kosmosga muvaffaqiyatli uchirildi. Mazkur kompaniya rahbari va Baykar kompaniyasi boshqaruv kengashi raisi Selchuk Bayraktar hisoblanadi.
"FGN-100-d1" yo‘ldoshi "Falcon 9" raketasi orqali "Transporter-12" missiyasi doirasida uchirildi. Ushbu missiyada 131 ta foydali yuk, jumladan, parvozni onlayn uzatuvchi vosita, mikrosun’iy yo‘ldoshlar va orbitadagi transport vositalari kosmosga yetkazildi.
"Fergani Space" kompaniyasi o‘zining innovativ va original texnologiyalari orqali kosmik transport hamda past orbitali yo‘ldosh xizmatlari sohasida barqaror va iqtisodiy jihatdan samarali yechimlarni taqdim etishni maqsad qilgan.