"Fergani Space" компаниясининг биринчи сунъий йўлдоши космосга учирилди. Ушбу қурилмага буюк астроном, математик ва географ олим — Аҳмад Фарғоний шарафига "Fergani" номи берилди.
"Fergani" компаниясининг "FGN-100-d1" деб номланган биринчи сунъий йўлдоши "SpaceX" компаниясига тегишли "Falcon 9" ракета-ташувчиси орқали АҚШнинг Ванденберг базасидан космосга муваффақиятли учирилди. Мазкур компания раҳбари ва Байкар компанияси бошқарув кенгаши раиси Селчук Байрактар ҳисобланади.
"FGN-100-d1" йўлдоши "Falkon 9" ракетаси орқали "Transporter-12" миссияси доирасида учирилди. Ушбу миссияда 131 та фойдали юк, жумладан, парвозни онлайн узатувчи восита, микросунъий йўлдошлар ва орбитадаги транспорт воситалари космосга етказилди.
"Fergani Space" компанияси ўзининг инноватив ва оригинал технологиялари орқали космик транспорт ҳамда паст орбитали йўлдош хизматлари соҳасида барқарор ва иқтисодий жиҳатдан самарали ечимларни тақдим этишни мақсад қилган.