Transport vazirligi hamda Eron yo’l va shaharsozlik vazirligi vakillari o’rtasida videokonferensiya shaklida muzokaralar o’tkazildi.
Vazirlik axborot xizmatining xabar berishicha, uchrashuv doirasida O’zbekiston, Turkmaniston, Eron hukumatlari o’rtasida xalqaro transport yo’lagini tashkil etish to’g’risidagi bitim imzolashni jadallashtirish muhokama qilingan.
Shuningdek, Eron hududida xalqaro avtotransport qatnovlarida milliy tashuvlardan undiriladigan yig’imlar miqdorini kamaytirish, eksport va import yuklari uchun “Bandar-Abbos” va “Chabahor” portlaridan foydalanish imkoniyatlari hamda O’zbekiston-Afg’oniston-Eron xalqaro transport yo’nalishini rivojlantirish masalalari yuzasidan ham fikr almashilgan.