O‘zbekiston sog‘liqni saqlash vaziri Asilbek Xudayarov “O‘zbekiston 24” telekanaliga bergan intervyusida 2025-yilning yanvar–sentabr oylarida mamlakat bo‘ylab 155 nafar qiz voyaga yetmasdan turmushga chiqqanini ma’lum qildi.
Ma’lumotlarga ko‘ra, erta turmushga chiqqan qizlarning yoshi 15–17 oralig‘ida bo‘lgan. Vazirning ta’kidlashicha, bunday nikohlar, ayniqsa, qarindosh-urug‘lar o‘rtasida tuziladigan bo‘lsa, tibbiy jihatdan salbiy oqibatlarga olib keladi hamda nogiron farzandlar tug‘ilishi xavfini oshiradi.
Avvalroq prezident Shavkat Mirziyoyev raisligida o‘tkazilgan videoselektor yig‘ilishida 2025-yil boshidan buyon 32 mingga yaqin oila ajralib ketgani, 16 ming ota-ona esa aliment to‘lash majburiyatini bajarmayotgani qayd etilgandi. Yig‘ilishda ajrimlarning ijtimoiy oqibatlarini yumshatish, xususan, nikoh shartnomasi tuzish amaliyotini kengaytirish zarurligi alohida ta’kidlandi.