Bolalar milliy tibbiyot markazida ilk bor 15 yoshli bemorda jigar transplantatsiyasi amaliyoti muvaffaqiyatli bajarildi. Bu haqida SSV matbuot xizmati xabar berdi. Aytish joizki, jigar transplantatsiyasi – o‘ta noyob operatsiya. Ayniqsa, uni bolalarda o‘tkazish juda murakkab hisoblanadi.
Ushbu yuqori texnologik amaliyot markaz jarroh va transplantologlari hamda Moskvadagi Akademik V.I.Shumakov nomidagi transplantatsiya va sun’iy organlar markazi yetakchi mutaxassislari hamkorligida bajarildi.
Natijada surunkali jigar yetishmovchiligi hamda autoimmun gepatit tashxisi qo‘yilgan 15 yoshli Umidjon Mirkamolov darddan forig‘ bo‘ldi. Unga otasi Kamoliddin Isroilov donorlik qildi.
Shifokorlarning so‘zlariga ko‘ra, hozir bemorning ahvoli yaxshi. Zarur tibbiy muolajalar davom ettirilmoqda.