Eron hududlaridan issiq havo oqimlari kirib kelishi sababli respublika hududida havo harorati maksimal darajaga chiqishi kutilmoqda. Bu haqda “O‘zgidromet” direktori Facebookdagi sahifasida xabar berdi.
Sherzod Habibullayevning maʼlum qilishicha, Eron hududidan 5-8-iyun kunlari O‘zbekistonga issiq havo kirib kelishi hisobiga havo harorati 42 darajagacha ko‘tarilishi mumkin. Ayrim joylarda 7-8-iyun kunlari shamol tezligi kuchayib, chang-to‘zon kuzatilishi mumkin. Natijada ayrim hududlarda maksimal havo harorati odatdagi meyoridan yuqori bo‘lishi kutilmoqda.
Jumladan, 5−6 iyunda harorat Qoraqalpog‘iston Respublikasi, Xorazm viloyatida 40-41 darajagacha ko‘tariladi. 6−8 iyunda esa Buxoro, Navoiy, Qashqadaryo, Surxondaryo viloyatlarida 40-42 darajagacha issiq bo‘ladi. Shuningdek, 5−8 iyunda Toshkent, Samarqand, Jizzax, Sirdaryo viloyatlarida 38-40 darajagacha, 7−8 iyunda Farg‘ona vodiysi viloyatlarida harorat 36-39 darajagacha ko‘tarilishi kutilmoqda.