Bugun, 20 aprel kuni tungi vaqtda Polsha Sileziyasidagi “Pniyeviyek” konida kuchli portlash sodir bo‘ldi. Bu haqda “RMF24” radiostansiyasi xabar qildi.
Qayd etilishicha, voqea yuz bergan vaqtda konda 42 nafar ishchi bo‘lgan. Ulardan besh nafari halok bo‘lgan, 20 dan ortig‘i jarohat olgan. Yana yetti nafarining taqdiri hozircha noma’lum.
Yangilangan ma’lumotlarga ko‘ra, konda ketma-ket portlash ro‘y bergan. Ikkinchisi kuchliroq va birinchi qutqaruv guruhi odamlarni qidirish uchun ketganidan keyin sodir bo‘lgan.
Yo‘qolgan deb taxmin qilingan uch nafar konchi o‘lik holda topilgan, yana bir kishi esa kasalxonaga olib ketilayotganda vafot etgan.
Ayni paytda qidiruv ishlari yangi portlash xavfi sabab to‘xtatilgan. Voqea joyiga Bosh vazir Mateush Moravetski yetib kelgan.