Бугун, 20 апрель куни тунги вақтда Полша Силезиясидаги “Пниевиек” конида кучли портлаш содир бўлди. Бу ҳақда “PMF24” радиостанцияси хабар қилди.
Қайд этилишича, воқеа юз берган вақтда конда 42 нафар ишчи бўлган. Улардан беш нафари ҳалок бўлган, 20 дан ортиғи жароҳат олган. Яна етти нафар кончининг тақдири ҳозирча номаълум.
Янгиланган маълумотларга кўра, конда кетма-кет портлаш рўй берган. Иккинчиси кучлироқ ва биринчи қутқарув гуруҳи одамларни қидириш учун кетганидан кейин содир бўлган.
Йўқолган деб тахмин қилинган уч нафар кончи ўлик ҳолда топилган, яна бир киши эса касалхонага олиб кетилаётганда вафот этган.
Айни пайтда қидирув ишлари янги портлаш хавфи сабаб тўхтатилган. Воқеа жойига Бош вазир Матеуш Мораветски етиб келган.