Davlat-xususiy sherikchilik shartlari asosida bunyod etilgan va zamonaviy IT-kommunikatsiya texnologiyalari bilan jihozlangan Uchtepa tumani Davlat xizmatlari markazining 1000 kvadrat metr maydonga ega yangi binosi o‘z faoliyatini boshladi.
Bino qurilishida, zamonaviy shaharsozlik normalariga muvofiqlik va fuqarolar uchun eng qulay sharoitlarni yaratishga alohida eʼtibor berildi. Bu yerda elektron navbat tizimi, axborot kioskasi, elektron xizmatlardan mustaqil foydalanish va salomatlik burchaklari, bolalar maydonchasi hamda mini-kutubxona tashkil qilingan. Tashrif buyuruvchilar xizmatlardan mustaqil foydalanishlari shuningdek, turli imkoniyatlardan xabardor bo‘lishlari uchun axborot stendlari
va posterlar qo‘yilgan.
Ushbu Markaz tumandagi 280 mingga yaqin aholiga xizmat ko‘rsatish bilan birga, eksterritorial tamoyili asosida Toshkent shahri
va respublikamizning barcha xududlaridan tashrif buyurgan fuqarolarga ham xizmat ko‘rsatadi.
Agentlik xizmat ko‘rsatish sifatini yana-da yaxshilash va imkon qadar soddalashtirish ustida doimiy ravishda izlanib, bu boradagi ishlarini davom ettirmoqda. Markazda elektron navbat tizimi bilan integratsiya qilingan maxsus platforma mavjud bo‘lib, uning yordamida mijozlar xizmat ko‘rsatish jarayoni va xizmat ko‘rsatgan xodimni baholash mumkin bo‘ladi. Bu esa fuqarolar bilan qayta aloqaning muhim usullaridan biri sifatida murojaatchilar uchun xizmat ko‘rsatish sifatini yana-da oshirishga yordam beradi.
Yangi Markazda O‘zbekiston Respublikasi fuqarosi, O‘zbekiston Respublikasida doimiy yashovchi chet el fuqarosi va fuqaroligi bo‘lmagan shaxsning identifikatsiya ID-kartasini hamda O‘zbekiston Respublikasi fuqarosining xorijga chiqish biometrik pasportini rasmiylashtirish bo‘yicha davlat xizmati tajriba-sinov tariqasida joriy etilgan bo‘lib, 2022 yil 1 yanvardan boshlab, ushbu davlat xizmati Davlat xizmatlari markazlari orqali ham ko‘rsatiladi.
Tashrif buyuruvchilarning fikr-mulohazalarini inobatga olgan holda, davlat xizmatlaridan foydalanishda NFC mahsus qurilmasi ishga tushirildi. Uning yordamida ID kartadagi fuqaroning shaxsi aniqlanadi va tizimda arizachining maʼlumotlari avtomat tarzda to‘ldiriladi.
Jismoniy imkoniyati cheklangan, turli sabablarga ko‘ra nogiron bo‘lib qolgan murojaatchilarga barcha sharoitlarni yaratish maqsadida nogironlik aravachasi orqali binoga kirish imkonini beruvchi pandus hamda shaxsiy ehtiyojlar uchun alohida xona shuningdek, “surdo-online” xizmatlari mavjud.
Hozirda Toshkent shahrida 12 ta Davlat xizmatlari markazi mavjud bo‘lib, ularning beshtasi zamonaviy jihozlangan binolarga ega.
Munojat Valiyeva