Markaziy saylov komissiyasi 5-iyun kuni siyosiy partiyalar tomonidan tasdiqlangan nomzodlfrni O‘zbekiston prezidentligiga nomzod sifatida ro‘yxatga olish va saylovoldi tashviqot dasturlari 7-iyundan boshlanishi to‘g‘risida qaror qabul qildi.
Unga ko‘ra, Markaziy saylov komissiyasining navbatdagi majlisida Xalq demokratik partiyasidan Ulug‘bek Ilyosovich Inoyatovni, Tadbirkorlar va ishbilarmonlar harakati — O‘zbekiston liberal-demokratik partiyasidan Shavkat Miromonovich Mirziyoyevni, O‘zbekiston “Adolat” sosial-demokratik partiyasidan Robaxon Anvarovna Maxmudovani hamda O‘zbekiston Ekologik partiyasidan Abdushukur Xudoyqulovich Xamzayevni O‘zbekiston prezidentligiga nomzod etib ro‘yxatga olish to‘g‘risidagi qaror qabul qilindi.
Shuningdek, majlisda prezidentlikka nomzodlarning saylovoldi tashviqoti 7-iyundan boshlanishi ham maʼlum qilindi. Maʼlumot uchun, O‘zbekistonda 2023-yil 9-iyul kuni muddatidan oldin prezidentlik saylovi o‘tkazilishi belgilangan.
