Rossiya prezidenti Vladimir Putin Falastin xalqini qo‘llab-quvvatlash maqsadida “Tinchlik kengashi”ga katta miqdorda moliyaviy yordam ajratishga tayyor ekanini ma’lum qildi. Bu haqda Times of India nashri xabar bermoqda.
Uning aytishicha, bu mablag‘lar G‘arb davlatlarida muzlatib qo‘yilgan Rossiya aktivlari hisobidan yo‘naltirilishi mumkin. Bu haqda Putin Falastin muxtoriyati rahbari Mahmud Abbos bilan o‘tkazilgan uchrashuvda bayonot bergan.
Prezidentning so‘zlariga ko‘ra, mazkur tashabbus Falastindagi tinchlik jarayonlarini qo‘llab-quvvatlashga qaratilgan. Putin bu masalani xalqaro darajada muhokama qilish niyatida ekanini ta’kidlab, payshanba kuni kechqurun AQSh delegatsiyasi bilan bo‘lib o‘tadigan uchrashuvda ham ushbu taklifni ko‘tarishini bildirdi.
BBC xabar berishicha, Moskva yaqin kunlarda muhim diplomatik uchrashuvlarga mezbonlik qiladi. AQSh prezidenti Donald Trampning maxsus vakili Stiv Uitkoff hamda uning kuyovi Jared Kushner payshanba kuni kechqurun Rossiya poytaxtiga kelishi kutilmoqda. Tashrif doirasida asosan Ukrainadagi urushni tinch yo‘l bilan hal qilish masalalari muhokama qilinadi.
Tahlilchilarga ko‘ra, Falastin masalasi va Ukraina urushi bo‘yicha muzokaralarning bir vaqtning o‘zida kun tartibiga chiqishi global siyosiy jarayonlarning o‘zaro chambarchas bog‘liqligini ko‘rsatadi. Rossiyaning bir milliard dollar ajratish haqidagi bayonoti esa Moskvaning Yaqin Sharqdagi ta’sirini saqlab qolish va tinchlik tashabbuslarida faol ishtirok etishga intilayotganidan darak beradi.