Россия президенти Владимир Путин Фаластин халқини қўллаб-қувватлаш мақсадида “Тинчлик кенгаши”га катта миқдорда молиявий ёрдам ажратишга тайёр эканини маълум қилди. Бу ҳақда Times of India нашри хабар бермоқда.
Унинг айтишича, бу маблағлар Ғарб давлатларида музлатиб қўйилган Россия активлари ҳисобидан йўналтирилиши мумкин. Бу ҳақда Путин Фаластин мухторияти раҳбари Маҳмуд Аббос билан ўтказилган учрашувда баёнот берган.
Президентнинг сўзларига кўра, мазкур ташаббус Фаластиндаги тинчлик жараёнларини қўллаб-қувватлашга қаратилган. Путин бу масалани халқаро даражада муҳокама қилиш ниятида эканини таъкидлаб, пайшанба куни кечқурун АҚШ делегацияси билан бўлиб ўтадиган учрашувда ҳам ушбу таклифни кўтаришини билдирди.
BBC хабар беришича, Москва яқин кунларда муҳим дипломатик учрашувларга мезбонлик қилади. АҚШ президенти Доналд Трампнинг махсус вакили Стив Уиткофф ҳамда унинг куёви Жаред Кушнер пайшанба куни кечқурун Россия пойтахтига келиши кутилмоқда. Ташриф доирасида асосан Украинадаги урушни тинч йўл билан ҳал қилиш масалалари муҳокама қилинади.
Таҳлилчиларга кўра, Фаластин масаласи ва Украина уруши бўйича музокараларнинг бир вақтнинг ўзида кун тартибига чиқиши глобал сиёсий жараёнларнинг ўзаро чамбарчас боғлиқлигини кўрсатади. Россиянинг бир миллиард доллар ажратиш ҳақидаги баёноти эса Москванинг Яқин Шарқдаги таъсирини сақлаб қолиш ва тинчлик ташаббусларида фаол иштирок этишга интилаётганидан дарак беради.