Maktab o‘quvchilari uchun qishki taʼtil 28-dekabrdan boshlanadi, III chorak 2023-yilning 11-yanvaridan boshlanadi. Bu haqda AOKAda o‘tkazilgan brifingda Xalq taʼlimi vazirligi axborot xizmati rahbari Laylo Rustamova maʼlum qildi.
Shuningdek, joriy yilning 16-dekabr kuni Xalq taʼlimi vaziri jamg‘armasi hisobidan har oylik ustamaga daʼvogar pedagoglarning saralash jarayonlari o‘tkazilishi haqida maʼlumot berildi. Mazkur sinov jarayonlari 2 bosqichda amalga oshiriladi.
1-bosqichda Xalq taʼlimi tizimini isloh qilish bo‘yicha Qoraqalpog‘iston Respublikasi, viloyatlar va Toshkent shahar kengashlari, yaʼni hokimliklar tomonidan kiritilgan nomzod-o‘qituvchilar “Boshlang‘ich taʼlim”, “Aniq va tabiiy fanlar”, “Xorijiy tillar”, “Ijtimoiy fanlar” va “Amaliy fanlar” yo‘nalishlari bo‘yicha bevosita Davlat test markazi tomonidan tegishli hududlarda sinovdan o‘tkaziladi.
2-bosqichga ushbu sinovlarda maksimal ballning 80 foizi yoki undan yuqori natija ko‘rsatgan nomzodlar o‘tadi va ularning kasbiy mahorati faol jamoatchilik vakillari va mahoratli pedagoglardan iborat Ishchi guruh tomonidan baholanadi.