Qozog‘iston mamlakatdan don va un olib chiqishni cheklamoqchi. Bu haqda mamlakat qishloq xo‘jaligi vaziri Erbol Karashukeyev maʼlum qildi.
Uning so‘zlariga ko‘ra, cheklov ikki hafta ichida joriy etiladi va 15-iyunga qadar amalda bo‘ladi. Shu bilan birga eksportyorlarga 1 million tonnagacha bug‘doy eksportiga ruxsat beriladi. Ammo ular buning evaziga ushbu miqdorning 10 foizini ichki bozorga arzonlashtirilgan narxda sotishlari kerak.
Qozog‘iston g‘alla eksporti bo‘yicha dunyoning yetakchi davlatlaridan biri. Bu mamlakat har yili 7-9 million tonna don sotadi.
Avvalroq Ukraina Rossiyani Misrni bug‘doysiz qoldirishda ayblab chiqqandi.