Qozog‘iston vakilasi Yelena Ribakina tennis olamidagi eng nufuzli musobaqalardan biri — “Australian Open”ning 2026-yilgi g‘olibasiga aylandi. Melburndagi Rod Laver Arenada bo‘lib o‘tgan final bahsida u dunyoning birinchi raqamli tennischisi Arina Sobolenkoni uch setlik keskin bellashuvda 6:4, 4:6, 6:4 hisobida taslim etdi. Bu haqda Financial express ma'lum qildi.
Hal qiluvchi uchrashuv yuqori saviyada va murosasiz kechdi. Ribakina birinchi setda ustunlikni qo‘lga kiritgan bo‘lsa, Sobolenko ikkinchi setda javob qaytardi. Ammo so‘nggi setda qozog‘istonlik tennischi sovuqqonlik va aniqlik namoyish etib, chempionlik taqdirini o‘z foydasiga hal qildi.
Bu g‘alaba Ribakina uchun “Katta dubulg‘a” musobaqalaridagi ikkinchi titul bo‘ldi. U avval ham yirik turnirlarda g‘alaba qozongan bo‘lsa-da, “Australian Open”dagi ushbu muvaffaqiyat faoliyatidagi eng muhim bosqichlardan biri sifatida baholanmoqda. Shuningdek, u Qozog‘iston tarixida ushbu turnirda yakkalik bahslarida chempion bo‘lgan ilk tennischiga aylandi.
Mutaxassislar Ribakinaning ushbu zafarini nafaqat sport natijasi, balki mental barqarorlik va katta o‘yinlardagi mahorat namunasi sifatida e’tirof etmoqda. Uning “Australian Open”dagi g‘alabasi ayollar tennisida kuchlar nisbatiga yangi ohang olib kirishi kutilmoqda.