Ijtimoiy tarmoqlarda O‘zbekiston fuqarosining “Qozondagi xorijiy fuqarolarni vaqtincha saqlash muassasasida 45 kundan beri saqlanayotgani” va Vataniga qaytishda yordam so‘ragani aks etgan videolavha yuzasidan quyidagilar ma’lum qilinadi.
O‘rganishlar natijasida, mazkur shaxs O‘zbekiston Respublikasi fuqarosi M.A. (1983-yilda tug‘ilgan) ekani aniqlandi. Unga nisbatan 2025-yil 2-avgust kuni Rossiya Federatsiyasi Ma’muriy javobgarlik to‘g‘risidagi kodeksining 18.8-moddasi 1.1-qismi (“mamlakatda qolish rejimini buzish”) bo‘yicha ma’muriy choralar qo‘llanilgan va Rossiya hududidan majburiy chiqarib yuborish to‘g‘risida qaror qabul qilingan.
Shuningdek, M.A. shu yilning 11-iyulida ham xuddi shu modda bo‘yicha javobgarlikka tortilgani aniqlangan. Fuqaroning xorijga chiqish pasportida Rossiya davlat chegarasidan o‘tish haqidagi muhrlarning qalbakilashtirilganlik belgilari mavjud bo‘lgani uchun hujjat ekspertizaga yuborilgan.
2025-yil 2-sentabr kuni Saratov viloyati Ichki migratsiya bo‘limi mazkur fuqaro uchun O‘zbekistonga qaytish guvohnomasi rasmiylashtirish yuzasidan Bosh konsulxonaga so‘rovnoma taqdim etgan. So‘rov Konsulxona tomonidan tezkor ravishda ijobiy hal qilingan. Hozirda Saratov viloyati ichki migratsiya idorasi vakilining Qozon shahriga xizmat safari amalga oshirilishi kutilmoqda.
Qozon shahridagi Bosh konsulxona mazkur masalani o‘z nazoratiga olgan va barcha zaruriy chora-tadbirlarni ko‘rishda davom etmoqda.