Davlat buyurtmachilarining xaridlarga oid eʼlonlari masofaviy monitoring tartibida o‘rganilgan.
Korrupsiyaga qarshi kurashish agentligi 2022-yilning yanvar oyida qurilish sohasidagi davlat xaridlari bo‘yicha o‘tkazilgan monitoring va tahlil natijalarini eʼlon qildi.
Unga ko‘ra, 2022-yilning yanvar oyida davlat buyurtmachilarining davlat xaridlari maxsus axborot portaliga joylashtirilgan davlat xaridlariga oid eʼlonlar masofaviy monitoring tartibida o‘rganilgan.
O‘rganishda, davlat buyurtmachilari tomonidan o‘tkazilgan qurilish sohasidagi davlat xaridlari sunʼiy ravishda qismlarga bo‘lingani, ayrim davlat xaridlarida bir xil ishtirokchilar takroran g‘olib bo‘lgani, ayrim buyurtmachilar qonun talablariga zid ravishda qurilish sohasidagi davlat xaridlari bo‘yicha eʼlonlarni "Shaffof qurilish" axborot markazining tender.mc.uz maxsus platformasiga joylashtirmagani va boshqa qonunbuzilish holatlari aniqlangan.
Qayd etilishicha, "Davlat xaridlari to‘g‘risida"gi qonunining 46-moddasida davlat xaridlarini amalga oshirishning raqobatga asoslangan usullarini chetlab o‘tish maqsadida davlat xaridlari hajmini qismlarga bo‘lib tashlashga yo‘l qo‘yilmasligi belgilangan.
Vazirlar Mahkamasining 2021-yil 5-fevraldagi 55-sonli qarori bilan tasdiqlangan "Qurilish sohasida tanlovlarni tashkil etish va o‘tkazish tartibi to‘g‘risida"gi vaqtinchalik nizomning 3-bandida, davlat buyurtmachilarining va Tiklanish va taraqqiyot jamg‘armasi mablag‘lari hisobidan qiymati bazaviy hisoblash miqdorining 2500 baravaridan ortiq (675 million so‘m) bo‘lgan qurilish sohasidagi davlat xaridlari tender.mc.uz maxsus axborot portali orqali elektron shaklda amalga oshirilishi belgilangan.
Ammo davlat buyurtmachilari tomonidan davlat xaridini amalga oshirish jarayonida yuqorida qayd qilingan qonunchilik talablari tizimli ravishda buzilishiga yo‘l qo‘yilib kelinmoqda. Jumladan:
"Navoiy savdo kompleks" aksiyadorlik jamiyati tomonidan 2022-yil 5-yanvar kuni jamiyat savdo kompleksini taʼmirlash bo‘yicha amalga oshirilgan qiymati 21,7 milliard so‘mlik;
-
“Toshkentdonmahsulotlari” AJ buyurtmachiligidagi 2022-yil 18-yanvar kuni jamiyat maʼmuriy binosini joriy taʼmirlash yuzasidan amalga oshirilgan qiymati 1,627 milliard so‘mlik;
-
"Paxtasanoat Ilmiy markazi" AJ buyurtmachiligidagi 2022-yil 17-yanvar kuni mehmonxona binosidagi 5 ta xonalarni buzib qayta rejalashtirish va dizayn asosida 8 ta lyuks xonalarga aylantirish yuzasidan amalga oshirilgan qiymati 996 million so‘mlik;
-
“Transgazinjiniring”MCHJ buyurtmachiligida 2022-yil 21-yanvar kuni "qurilish-taʼmirlash ishlari"ni bajarish yuzasidan amalga oshirilgan qiymati 2,456 milliard so‘mlik;
-
Qishloq xo‘jaligi vazirligi tasarrufidagi "Maʼmuriy-xo‘jalik xizmati" DUK buyurtmachiligida 2022-yil 24-yanvar kuni vazirlik maʼmuriy binosini joriy taʼmirlash yuzasidan amalga oshirilgan qiymati 1,681 milliard so‘mlik davlat xaridlarida qonunbuzilish holatlari aniqlangan.
Eslatib o‘tamiz, avvalroq qurilish sohasidagi qatʼiy talablar soddalashtirilishi haqida xabar berilgandi.
