Qit’alararo kubok finali Qatarda bo‘lib o‘tdi va unda Yevropaning eng yaxshi klubi “Real Madrid” hamda Shimoliy va Markaziy Amerikaning eng yaxshi jamoasi “Pachuka” to‘qnash keldi. Umuman olganda, bu avvalgi 23 yildagi klublar o'rtasidagi jahon chempionati formati edi. Avvalgi turnir qaytadan tashkil etilgan. Kelasi yil yozda mazkur musobaqada butun dunyodan 32 ta jamoa ishtirok etadi.
Kechagi uchrashuvda Anchelotti kuchsiz raqibga qarshi asosiy tarkib futbolchilarining barchasini maydonga tushirdi: Tibo Kurtua, Antonio Ryudiger, Fran Garsiya, Lukas Vaskes, Aurelien Chuameni, Federiko Valverde, Eduardo Kamavinga, Rodrigo, Bellingem, Vinisius va Kilian Mbappe. Raul Asensio, Arda Guler va Endrik kabi futbolchilar zaxirada qoldirildi.
Dastlabki daqiqalarda "Pachuka" tashabbusga ega bo‘ldi. Meksikaliklar Madrid jamoasidan farqli o‘laroq to‘pni ko‘proq ushlab turib, vaziyatlar yaratishdi. Ana shunday holatlardan birida Luis Rodriges jarima maydonchasi tashqarisidan yaqin burchakka xavfli zarba yo'llab, Kurtuaning reaksiyasini sinab ko'rdi. "Real" uzoq vaqt davomida hujum qilish haqida umuman o'ylamadi. Go'yoki raqibning imkoniyatlarini o'rganish bilan vaqt o'tkazdi. Sekin-sekin uchrashuvning davomiyligi mantiqiylashib bordi. Yevropaning eng yaxshi klubi bosimni oshirdi va bo'sh zonalardan unumli foydalandi. Biroq, dastlabki urinishlar barchasi besamar ketdi. 37-daqiqaga kelib Meksika klubi zarbalar soni bo'yicha raqiblaridan oldinda edi. Biroq, "Real" baribir o'z vaqtini kutdi. Birinchi bo'limning oxirlarida Bellingem chap qanotda faollik ko'rsatib to'pni Vinisiusga uzatdi, o'z navbatida braziyalik hujumchi ham to'pni markazda turgan Mbappega yetkazib berdi. Fransiyalik hujumchining darvoza tomon bergan zarbasi esa nihoyat gol bilan yakunlandi.
Ikkinchi bo'lim boshida Rodrigo ham gol urdi. U ajoyib dribling harakatlarini amalga oshirib, bir nechta raqiblarini chalg'itishga muvaffaq bo'ldi va to‘pni o‘ng oyog‘iga to'g'rilab darvozaning uzoq burchagiga qarab yo'lladi. Shu tariqa ispanlar hisobni ishonchli ko'rinishga olib kelishdi. Shundan so'ng, Anchelotti bir qator o'zgarishlarni amalga oshirishni boshladi. Murabbiy Brahim Diaz va Dani Seballosni Kamavinga hamda Kilian Mbappening o'rniga maydonga tushirdi. Keyinchalik u Rodrigoni Luka Modrichga almashtirdi. Meksikaliklarning bundan keyingi hujumlari muvaffaqiyatsiz yakunlandi. Vinisiusning penaltidan urgan goli esa Madrid jamoasiga mazkur uchrashuvdagi to'liq g'alabani ta'minladi.
Qit'alararo kubok 1960-yildan 2003-yilgacha o'tkazilgan. Shundan beri turnir tashkil etilmayotgan edi. Kechagi sovrin "Real" uchun to'rtinchisi bo'ldi. Jamoa bundan avval 1960, 1998 va 2002-yillarda kubokni qo'lga kiritgan. Anchelotti uchun qit'alararo kubok Madrid klubi safidagi 15-sovrin hisoblanadi.