Rossiya prezidenti Vladimir Putin yetakchi axborot agentliklari bilan bo‘lib o‘tgan uchrashuvda Rossiya va O‘zbekiston o‘rtasida migratsiya sohasidagi hamkorlik yangi bosqichga ko‘tarilayotganini ma’lum qildi. Bu borada tomonlar muhim kelishuvlarga erishgan.
Putinning ta’kidlashicha, O‘zbekistonda aholi sonining jadal o‘sishi mehnat bozorida yangi talab va chaqiriqlarni yuzaga keltirmoqda. Shu bois, mehnat migrantlarini Rossiyaga ketishidan avval tayyorlash, ularga rus tili va madaniyatini o‘rgatish bo‘yicha qo‘shma dasturlar ishlab chiqilmoqda.
Davlat rahbari, shuningdek, ikki mamlakat o‘rtasidagi yoshlar aloqalarini strategik yo‘nalish sifatida qayd etdi. Prezident Shavkat Mirziyoyev topshirig‘iga binoan bu borada aniq tashabbuslar ustida ish olib borilmoqda.
“Biz nafaqat ishchi kuchini tayyorlash, balki madaniy va ma’naviy integratsiyani ham kuchaytirmoqchimiz. Bu uzoq muddatli hamkorligimizning ajralmas qismidir”, — dedi Putin.
Ushbu kelishuvlar asosida ta’lim, madaniyat, yoshlar siyosati va migratsiya sohalarida Rossiya–O‘zbekiston hamkorligi izchil kengaytirib borilishi rejalashtirilgan.