Chet elda ota-ona qaramog‘isiz qolgan voyaga yetmagan bolalarni Vatanga qaytarish bo‘yicha ishlar izchil davom etmoqda. 2026-yil 8-fevral kuni O‘zbekiston mutasaddi idoralari vakillaridan iborat ishchi guruhning Rossiya Federatsiyasiga xizmat safari yakunlandi.
Mazkur safar doirasida Rossiya hududida qarovsiz qolgan 6 nafar voyaga yetmagan bola Toshkent shahridagi Islom Karimov nomidagi xalqaro aeroport orqali O‘zbekistonga olib kelindi.
Vatanga qaytarilgan bolalar dastlab Toshkent shahar Ichki ishlar bosh boshqarmasi huzuridagi Voyaga yetmaganlarga ijtimoiy-huquqiy yordam ko‘rsatish markaziga joylashtirildi. Bu yerda ular uchun zarur huquqiy, tibbiy va ijtimoiy yordam choralarini ko‘rish ishlari amalga oshirildi.
Barcha tartib-taomillar yakunlangach, bolalar belgilangan tartibda ota-onalari va yaqin qarindoshlariga topshirildi. Ularning keyingi ijtimoiy moslashuvi va qo‘llab-quvvatlanishi yashash hududlaridagi “Inson” ijtimoiy xizmatlar markazlari tomonidan davom ettiriladi.