Buxarestning Otopeni aeroportidan Oradeyaga uchgan “Airbus A320” samolyoti havoga ko‘tarilgandan 15 daqiqa o‘tib, dvigatelida portlash sodir bo‘ldi. Natijada samolyot Buxarestga favqulodda qaytishga majbur bo‘ldi.
Yo‘lovchilardan biri tomonidan olingan suratlarda samolyot chap qanoti yaqinida olov chiqayotganini ko‘rish mumkin. Hodisa chog‘ida bortda Oradeya meri ham bo‘lgan.
Aviakompaniya vakillarining maʼlum qilishicha, parvoz vaqtida aniqlangan texnik nosozlik sababli ekipaj xavfsizlik choralarini ko‘rib, aeroportga qaytishga qaror qilgan.
“Samolyot Buxarestga muvaffaqiyatli va hech qanday talofatsiz qo‘ndi. Texnik mutaxassislar nosozlik sabablarini tahlil qilishmoqda. Oradeyaga parvoz bekor qilindi va yo‘lovchilarga muqobil variantlar taklif qilindi”, — deyiladi aviakompaniya bayonotida.