Руминия осмонида самолёт двигателида ёнғин чиқди
Шундан сўнг самолёт фавқулодда қўнишга мажбур бўлган.
Бухарестнинг Отопени аэропортидан Орадеяга учган “Аирбус А320” самолёти ҳавога кўтарилгандан 15 дақиқа ўтиб, двигателида портлаш содир бўлди. Натижада самолёт Бухарестга фавқулодда қайтишга мажбур бўлди.
Йўловчилардан бири томонидан олинган суратларда самолёт чап қаноти яқинида олов чиқаётганини кўриш мумкин. Ҳодиса чоғида бортда Орадея мери ҳам бўлган.
Авиакомпания вакилларининг маълум қилишича, парвоз вақтида аниқланган техник носозлик сабабли экипаж хавфсизлик чораларини кўриб, аэропортга қайтишга қарор қилган.
“Самолёт Бухарестга муваффақиятли ва ҳеч қандай талофатсиз қўнди. Техник мутахассислар носозлик сабабларини таҳлил қилишмоқда. Орадеяга парвоз бекор қилинди ва йўловчиларга муқобил вариантлар таклиф қилинди”, — дейилади авиакомпания баёнотида.
